Поглаварот на Римокатоличката црква, Папата Франциск го осуди објавувањето лажни вести за корона вирусот и за вакцините и апелираше да им се помогне на луѓето кои веруваат во такви лаги, да ги разберат вистинските научни факти.

Папата Франциск се сретна со католичките новинари кои формираа мрежа за проверка на фактите во обид да се борат против дезинформациите за пандемијата.

Тој постојано повикува на одговорно новинарство кое ја открива вистината и ги почитува поединците, а пораката ја повтори и на средбата со новинарите кои работат на проверка на фактите.

Тешко е да не се забележи дека деновиве, заедно со пандемијата, се шири „инфодемија“, искривување на реалноста засновано на страв, што во нашето глобално општество доведува до експлозија на коментари за измамнички, но и измислени вести – истакна Папата Франциск.

Тој смета дека пристапот до точни информации, засновани на научни податоци, е човеково право кое особено мора да им се гарантира на оние кои се помалку способни да направат разлика меѓу вистината и многуте дезинформации претставени на интернет како факти.

Тој повика на милостив, мисионерски пристап кон оние кои стануваат жртви на лажни вести и апелираше да им се помогне да ја разберат вистината.

Некои католици, вклучително и некои конзервативни американски бискупи и кардинали, тврдат дека вакцините се засноваат на истражувања кои користат клетки добиени од абортирани фетуси и одбиваат да се вакцинираат.

Папата Франциск е целосно имунизирани со вакцините на „Фајзер/Бионтек“.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.