Заменик-претседателот на Владата на Република Македонија задолжен за економски прашања, координација со економските ресори и инвестиции, Фатмир Битиќи беше во посета на РЕК Битола, каде заедно со директорот на ЕСМ, Васко Ковачевски одржаа работен состанок со раководството и дел од производните единици, а го посетија и рудникот „ПЈС“ или поранешен „Суводол“.

Вицепремиерот Битиќи им се заблагодари на сите вработени во РЕК Битола од целиот народ за сé што прават, за сите напори кои ги вложуваат за да одговорат позитивно на предизвикот во кој што се наоѓаме со производство и снабдување со доволно количество електрична енергија од домашно производство, во целиот овој период на енергетска криза.

„Ова е вистинскиот одговор на кризата кој оваа Влада го дава. Рековме дека заеднички, со заеднички сили ќе го пребродиме овој период и ова е како се преземаат сите мерки за да обезбедиме доволно електрична енергија“, изјави вицепремиерот Битиќи.

Потсетувајќи дека штедењето на електрична енергија продолжува да биде одговорност за сите.

Производството на АД ЕСМ, 100% ги задоволи потребите за електрична енергија за потребите на домаќинствата и малите потрошувачи.

Директорот Ковачевски изјави дека е завршен ремонтот на термоелектраната и успешно е ставен во функција блок 1, а блок 2 континуирано е во функција.

„Во наредниот период се очекува да пристигне и трансформаторот за блок 3 со што ќе може да бидат во функција сите три блокови за производство на РЕК Битола“,изјави директорот Ковачевски.

Вицепремиерот Битиќи и директорот Ковачевски го посетија и рудникот „ПЈС“ или поранешен „Суводол“ каде констатираа дека има значителен ископ на домашен јаглен за производството на РЕК Битола, а со тоа и зголемено производство на електрична енергија.

„Даваме силна поддршка на вработените, во овие тешки услови да ги исполнат плановите, бидејќи имаме обврска од Владата и граѓаните да испорачаме 25% поголемо домашно производство на електрична енергија во текот на оваа година со цел пребродување на кризата. А, притоа да немаме рестрикции и да ја одржиме стабилна цената на електричната енергија“, рече директорот Ковачевски.

Вицепремиерот Битиќи и директорот Ковачевски заклучија дека сите преземени мерки и вложувања, кои се направија во последниот период, во дополнителна механизација, транспортни системи како и ремонтите кои што се направија во термоелектраните, денеска даваат резултат со зголемено производство на нашата најголема производна единица за електрична енергија РЕК Битола, што значи стабилен енергетски систем.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.