Шефот на ОН задолжен за хуманитарна помош, Мартин Грифитс, изјави дека се надева дека на вториот конвој со хуманитарна помош денеска ќе му биде дозволено да влезе во Појасот Газа.

Грифитс вели дека постои можност да помине уште еден конвој, пренесува Би-Би-Си

Можеби дури и малку поголем, до 30 камиони, појасни Грифитс.

Дваесет камиони со хуманитарна помош влегоа вчера во Појасот Газа преку преминот Рафа со Египет.

Ова беа првите камиони кои влегоа во Појасот Газа откако Израел воведе блокада пред две недели по нападот на Хамас.

Во меѓувреме, Светската програма за храна при ОН, соопшти дека цивилите во Газа се „на работ на катастрофа“ поради акутен недостиг на храна, вода и медицински материјали.

Агенцијата соопшти дека и се потребни 74 милиони долари за итни потреби во Појасот Газа во следните 90 дена. Се вели дека продавниците во Појасот Газа имаат резерви на храна за помалку од една недела и оти има сериозен недостиг од прехранбени производи.

Агенцијата на ОН апелира за „заштита на виталната инфраструктура и заштита на цивилите, за да можат да пристапат до точките и услугите за хуманитарна помош“.

Три камиони на Програмата за храна беа дел од конвојот од 20 камиони со помош што вчера влегоа во Газа преку граничниот премин Рафа. Уште 40 камиони на Светската програма за храна чекаат во Египет за да го преминат граничниот премин Рафа и да влезат во Газа, се вели во извештајот на оваа агенција.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.