Советот за македонски јазик со соопштение реагира на „дилемите“ што се поставија во рамките на јавната и собраниската расправа во однос на лекторскиот испит предвиден во новиот Закон за употребата на македонскиот јазик.

Од Советот нагласуваат дека „лекторскиот испит е замислен како супспецијалистички испит наменет за дипломирани студенти чијашто експертиза, според обемот на предмети од областа на македонскиот јазик, е токму македонскиот стандарден јазик“.

Тие имаат неспоредливо поголем квантум лингвистички предмети од нивните колеги специјалисти по македонска книжевност, односно општа и компаративна книжевност, најмалку 2:1. На пример, додека едните полагале Општа лингвистика, другите полагале Теорија на литературата. На групата Македонски јазик се полагаат специјалистички предмети како Специјален курс по македонски јазик, што во основа е курс по лектура, Основи на лекторирањето 1-6 во посебна лекторска насока итн. Самиот лекторски испит е димензиониран имајќи го тоа предвид, потенцираат од Советот за македонски јазик во своето соопштение.

Во соопштението на Советот уште се нагласува дека „кога станува збор за самиот Закон за употреба на македонскиот јазик, тој регулира еден мал дел од многу широката научна област македонистика, а тоа е македонскиот стандарден јазик“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.