Србите во Босна и Херцеговина се „ментално интегрирани“ со Србија и ќе ја поддржат евентуалната независност на Република Српска (РС), тврди нејзиниот претседател Милорад Додик во интервју за Франс прес.

Не сакаме да останеме овде, вели  Додик во интервју за француската агенција објавено на Денот на Република Српска, прослава на која централните власти на Босна и Херцеговина и Организацијата за европска безбедност и соработка (ОБСЕ) сметаат дека е неуставна. Во интервјуто Додик посочува дека над 80 овластувања на РС се префрлени на централната власт во Сараево и тие сакаат да ги вратат.

„Франс прес“ пишува дека Додик во последно време се занимава со проблематиката на државниот имот како што се недвижен имот и шуми, кои, според него, им припаѓаат на субјектите и се прашање на „живот и смрт“. Медиумите во Босна и Херцеговина, пак, тврдат дека нивен сопственик е државата, пишува француската агенција.

Тоа прашање сè уште не е правно решено, а висок претставник на меѓународната заедница, со овластување да го донесе или укине законот, би можел да биде оној кој ќе пресуди.

Ако тоа се случи, ќе одиме во Народното собрание на РС и ќе донесеме одлука за независност, предупредува Додик.

Ќе ги повлечеме Србите од војската, полицијата, заедничките институции. Им препорачувам да не влегуваат во таа приказна, се закани тој.

Додик тврди дека целта на Западот е да ја направи Република Српска бесмислена и да создаде централизирана Босна и Херцеговина.

Нашиот карактер не дозволува тоа да се случи. Затоа денеска со гордост го славиме 9 јануари, рече тој.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.