Компанијата „Party Pieces“, во сопственост на Керол (68) и Мајкл Мидлтон (73), родителите на Кејт Мидлтон, прогласила банкрот. Компанијата работела долги 36 години и се занимавала со декорација и продажба на опрема за детски забави, пишувале „The Kit“.

Очигледно, веќе 3 години како на нивниот бизнис не одело најдобро. Проблемите започнале за време на пандемијата со корона вирусот. Сè резултирало со тоа да ја завршат 2022 со негативен баланс, односно со загуба, што довело до прекин на работењето и прогласување банкрот. Во моментов се проценува дека тие на поверениците им должеле нешто повеќе од 3 милиони евра.

Инаку, компанијата ја основала Керол, барајќи украси за роденденската забава на Кејт Мидлтон. Таа сфатила дека не можела да го добие она што го сака и се одлучила да започне семеен бизнис кој би се занимавал токму со тоа – сите потребни материјали за забави и родендени. Тогаш и се создала компанијата „Party Pieces“.

На почетокот сама работела во кујната, правејќи сè што ѝ било потребно за забавите, а бизнисот почнал дури откако почнала да плаќа огласи во детски списанија. Во 1992 година, таа почнала да ги продава своите производи преку Интернет, што се покажало како повеќе од добра одлука, бидејќи продажбата „вртоглаво“ почнала да расте.

Повеќе од 3 децении подоцна, богатството на Керол Мидлтон било проценето на околу 67 милиони долари, а само нејзината компанија, која на клиентите им нудела сè за роденденски забави, било да е тоа „Хари Потер“, „Пепа Прасе“ или што било друго, само минатата година вредела 40 милиони долари.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.