По остри реакции на граѓани од источниот регион за затвореното засолниште за жртви на семејно насилство во Свети Николе, министерот за труд и социјална политика Ѓоко Велковски денеска го посети овој објект и наиде на затворени врати.

Во услови кога бројките на жртви на семејно насилство растат, да се затвори објект кој е од клучно значење за заштита на жени жртви на насилство е крајно нехумано и нечовечки од страна на власта која 7 години ја води државата, се вели во соопштението од МТСП.

Вработените во Центарот за социјална работа Свети Николе биле немоќни да ја санираат состојбата и не наишле на слух во министерството.

Откако пред единаесет години е отворен центарот, во последните седум години не е вложено ниту еден денар. Ниеден претходен министер, дури ни стручните служби во министерството задолжени за оваа област, немале заинтересираност за овој објект. Шелтерот за жени не функционира повеќе од една година. Кога немате поддршка од централната власт не можете да направите ништо. Единствено градоначалникот на Општина Свети Николе ни помогна во санирање на поплавата која ни се случи, велат вработените.

Според Велковски токму ваквите состојби на рушење и негрижа за жените жртви доведува до фемициди каде жени страдаат од убиства.

Инаку, Шелтер центарот е граден со поддршка на УНДП во време на владеењето на Владата на ВМРО ДПМНЕ.

Истамбулската конвенција чиј потписник е државата точно пропишува стандарди за сервиси и услуги за жени жртви на насилство и семејно насилство и недозволиво е да се запоставуваат вакви капитални инвестиции, велат од МТСП.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.