Борбите на Вера на многу начини не ги претставуваат предизвиците на мојата генерација и тоа само по себе беше мошне интересно за размислување. Затоа што како жени, не само на Балканот, туку и глоболно, напредувавме со неверојатна брзина во 20. век, вели режисерката на филмот „Вера сонува за морето“ Калтрина Красниќи, кој вечерва во 20,30 часот на Кровот на ГТЦ ќе биде прикажан на Фестивалот на европски филм „Синедејс“ кој е во тек во Скопје.

„Вера сонува за морето“ ја раскажува приказната за Вера, како главна улога на филмот, одиграна од страна на Теута Ајдини-Јегени, преведувач на знаковен јазик, која по самоубиството на сопругот, реномираниот судија, Фатмир Гаши, се наоѓа во ситуација самата да преговара за иднината на нејзината ќерка и внука со традицијата и државата, во момент кога сите ги презираат жените како нив.

„Вера сонува за морето“ беше премиерно прикажан на Филмскиот фестивал во Венеција, во септември 2021 година. Оттогаш е премиерно прикажан во дваесетина земји, гостувал на повеќе од триесет фестивали и во следните месеци ќе биде прикажан на уште неколку Фестивали.

Кино-прикажувањето на филмот започнува на крајот на август, почнувајќи со Косово, Македонија и Албанија, а потоа и Италија.

Доста интензивно патував со филмот и го презентирав пред многу публика. Морам да кажам, проекциите обично се многу емотивни, бидејќи приказната на Вера не зборува само за нејзината географија. Нејзината драма предизвикува многу прашања, но и одекнува универзално. Бидејќи економскиот диспаритет на жените не е специфичен за Балканот, туку ги погодува жените ширум светот, вели режисерката Красниќи за „Република“.

Покрај Теута Ајдини-Јегени во филмот играат Рефет Абази, Алкета Силај, Астрит Кабаши и други. Сценариото за филмот е на Дорутина Баша, а кинематографија на Севдије Кастрати.

Со Дорунтина Баша се знаеме од детството. Во 2014 година, таа ми понуди да прочитам многу ран нацрт на „Вера сонува за морето“. Бев неизмерно трогнатa од тоа, бидејќи приказната ја раскажуваше жена, преведувач на знаковен јазик, во раните 60-ти. Не можев да се сетам кога последен пат сум гледалa филм, драма или сум прочитала книга каде жена од таа генерација била главна улога. Нејзината возраст овозможи да навлезе во општеството од некои многу сложени агли и исто така да изгради многу слоевит филм. Борбите на Вера на многу начини не ги претставуваат предизвиците на мојата генерација и тоа само по себе беше мошне интересно за размислување. Затоа што како жени, не само на Балканот, туку и на глобално ниво, напредувавме со неверојатна брзина во 20. век. Понекогаш промените се толку радикални од една генерација до друга што дури ни недостасуваат средства за комуникација. Овој филм го гледам како можност за дијалог меѓу жените, но и мажите, вели Красниќи.

Во „Вера сонува за морето“ монтажер е Владимир Павловски, а снимател на звук е Игор Поповски. Композитор на филмот е Петрит Чеку, дизајнер на звук е Дарко Спасовски.

Нашиот македонски копродуцент е Огнен Антов – Dream Factory, и соработката со него беше исклучителна! Освен со кастингот на Теута Ајдини Јегени и Рефет Абази, работевме со одлична македонска екипа во снимање и дизајн на звук (Игор Поповски, Дарко Спасовски) како и монтажа со Владимир Павловски.
Косовската и македонската филмска сцена имаат зад себе речиси една деценија одлична соработка која се покажа како успешна на меѓународен план. Нашите мали земји беа добри во промоцијата и поддршката на талентите преку границите. Сметам дека овој став е многу здрав, тоа е став кој ветува иднина за раскажувачите, вели Красниќи.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.