Портпаролот на Кремљ, Дмитриј Песков, порача дека Русија многу внимателно ќе ги следи воените вежби „Платинест волк“ што Србија ги изведува со САД и 10 други земји.

Што се однесува до наведените вежби, секако ќе ги следиме многу внимателно – одговори Песков на новинарското прашање дали Русија е загрижена од намерата на Србија да одржи воени вежби со САД.

Според Песков, не престануваат притисоците врз Белград да усвои антируски став.

Постои постојан обид Србија да се привлече на страната на оние кои имаат антируски став. Знаеме дека Белград е под огромен притисок, притисок без претседан, истакна портпаролот на Кремљ.

Како што соопштија српските медиуми, Војската на Србија годинава ќе одржи воена вежба „Платинест волк“ со припадниците на американската војска и западните партнери, со што ќе се прекине мораториумот за учество на билатерални и мултилатерални вежби со сите партнери, воведен по војната во Украина.

Активирањето на меѓународните воени вежби на 23 март го спомена и високиот советник на американскиот Стејт департмент, Дерек Шоле, кога на Твитер му се заблагодари на српскиот претседател Александар Вучиќ за неговиот конструктивен ангажман во Охрид, но и за „повторниот ангажман со САД во одбранбените воени вежби“ со натпис „# PlatinumWolf“.

Од Министерството за одбрана на Србија, за медиумите потврдија дека во Србија ќе се одржи воената вежба „Платинест волк 23“, како и дека припадниците на вооружените сили ќе тренираат со војниците на НАТО и нивните сојузници.

Со заклучокот на Владата на Србија од 16 март 2023, одобрено е спроведување на меѓународната тактичка вежба „Платински волк 23“, со што таа вежба се иззема од мораториумот за планирање, подготовка и реализација на вежби со странски партнери во земјата и странство. Причината за донесувањето ваквата одлука е исполнување на обврските преземени од Србија во врска со учеството на српските вооружени сили во мултинационални операции, соопшти Министерството за одбрана во одговорот на прашањето за одржување на вежбата.

Меѓународната тактичка вежба „Платинумски волк 23“ ќе се одржи од 16 до 30 јуни 2023 година во Србија заедно со неколку земји партнери со кои српските вооружени сили учествуваат во мултинационални операции. Целта на оваа вежба е одржување на постигнато ниво на интероперабилност на единиците на вооружените сили на Србија за учество во мултинационални операции.

Од Министерството за одбрана потенцираат дека мораториумот на меѓународните воени вежби се уште трае, а дека оваа вежба со НАТО е исклучок.

Напоменуваме дека одлуката на Владата на Република Србија од 27 февруари 2022 година, со која се суспендираат и одложуваат сите активности поврзани со вежби со странски партнери, сè уште е во сила, нагласуваат од надлежното министерство.

„Платински волк“ е вежба која се изведува во Србија од 2014 година со идеја, покрај непосредна подготовка за учество во мултинационални операции, да го стимулира развојот на базата „Југ“ како регионален центар за обука.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.