Првиот затворен пазар во Општина Кисела Вода денеска официјално беше пуштен во употреба, информираат од општината.

Како што се појаснува во соопштението, се работи за простор на површина од 250 квадратни метри, каде се поставени 16 тезги.

Градоначалникот Орце Ѓорѓиевски му се заблагодари на Министерството за локална самоуправа, што излезе во пресрет на потребите на граѓаните и за реализација на овој проект, вреден 13 милиони денари, влезе во финансиско партнерство со Општина Кисела Вода. Тој најави затворен пазар и за жителите на населбата Драчево.

– Реализацијата на овој проект беше голема потреба за нашите жители, кои триесет години чекаа на достоинствени и современи услови за купување, но и за пласман на земјоделски и градинарски производи. На ова место постоеше див пазар, што не исполнуваше никакви санитарни и хигиенски услови и воедно, го нагрдуваше просторот што е во срцето на Кисела Вода. Проектот е вреден 13 милиони денари, а од нив, 9,8 милиони денари се обезбедени токму од Министерството за локална самоуправа. Воедно, сакам да упатам и голема благодарност до советникот од Советот на Општина Кисела Вода, Јане Петковски од редовите на ЛДП за заложбите за реализација на проектот, додаде градоначалникот.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.