Министерот за надворешни работи Бујар Османи e упорен да протне дипломати по мерка за претседавањето на Македонија со ОБСЕ во 2023 година. Откако сакаа срцето на потенцијалниот кандидат да е критериум да биде испратен на мисија сега сакаат спротивно од законот за МНР,  дипломатите две години најмалку да биле во Скопје во МНР од завршувањето на претходниот мандат.

МНР сака да поставува дипломати кои со срцето ќе припаѓаат онаму каде ќе ги пратат за да не можат да бидат вратени по промената на власта

 

Тој  на денешната прес-конференција изјави дека опозицијата со 180 амандмани го блокира предлогот кој се однесува на еден член од Законот за надворешни работи, кој претставува ограничување при селекцијата на дипломати за претседавањето со ОБСЕ. Односно, според тој член, за еден дипломат да замине на мисија треба од завршувањето на претходната мисија, да има престој од 24 месеци во Министерството за надворешни работи, до следниот мандат.

– За да го објаснам контекстот, за да се испратат дипломати на тригодишен мандат, покрај другите критериуми, треба да исполнат уште еден критериум, а тоа е две години најмалку да биле во Скопје во МНР од завршувањето на претходниот мандат. Значи 24 месеци требало да поминат од враќањето од претходниот мандат. Бидејќи претседавањето со ОБСЕ е вонредно, една вонредна специјална мисија во која што дипломатите ќе одат не на цел мандат, туку на 14-15 месеци и за да не бидеме ограничени во изборот на дипломати коишто ќе ги испратиме, затоа пратениците откако им ја објаснивме оваа проблематика, предложија измени на еден став, односно за претседавање како што е ОБСЕ, односно за вакви специјални мисии, да не важи ограничувањето 24 месеци, наведе Османи.

Тој додаде дека и покрај тоа што опозицијата била информирана навреме, сепак поднеле 180 амандмани.

– Опозицијата беше информирана навреме, затоа што јас ги информирав и претставниците на опозицијата и претставниците на Владата. Претставниците на Владата прифатија да помогнат во овој процес, претставниците на опозицијата иако не најавија дека имаат каква било забелешка, сепак излегоа со 180 амандмани, од кои некои смешни, провокативни, само да го блокираат процесот којшто нема врска со никаков владин, партиски, политички интерес. Едноставно да можеме да ги избереме најдобрите за најголемиот надворешно-политички предизвик и привилегија што ја има државата. Ваква можност немала една мала држава, да раководи организација од 57 земји-членки каде што се и САД, и Русија и најголемите држави во светот и ние ќе ја претстедаваме таа Организација во текот на цела година, вклучувајќи како копретседавачи една година порано. Тоа беше целта на таа измена. Се надевам дека ќе можеме сега да пристапиме понатаму кон овие измени за да ги создадеме сите логистички предуслови за едно ефикасно претседавање, истакна Османи.

Македонија стана дел од триото претседавачи на ОБСЕ или познато како ОБСЕ тројка, заедно со сега веќе минатогодишниот претседавач Шведска, како и актуелниот претседавач за оваа година Полска. Со тоа и формално започнуваат и нашите обврски поврзани со претседавањето во 2023 година со најголемата регионална безбедносна организација ОБСЕ во која членуваат 57 земји, плус 11 медитерански и азиски земји партнери на Организацијата.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.