Над 17 села во североисточниот дел на Крф, седум во јужниот дел на грчкиот остров Евија и две во северниот дел на Пелопонез, превентивно беа евакуирани во текот на ноќта поради големите пожари активни од вчера, јави дописничката на МИА од Атина.

Паралелно, веќе седми ден, сѐ уште активен е и пожарот на островот Родос, меѓутоа засега, не се во опасност населени места.

Во текот на ноќта четирите големи пожари во Грција, на четири различни локации, се гаснеа од копно, а со првите зраци на сонцето, започна и гаснењето со воздушните средства.

На Крф, ситуацијата со пожарот во североисточниот дел на островот, утрово е значително подобрена, а во евакуацијата во текот на ноќта помагаше и Крајбрежната служба на Грција за локалното население и туристите по морски пат да бидат пренесени на безбедна локација.

Во јужниот дел на островот Евија, пораки за превентивна евакуација беа испратени и рано утрово, а во северниот дел на Пелопонез, иако во текот на ноќта превентивно беше евакуирано локалното население од две села, сепак утрово се чини дека огнените јазици се далеку од населените места.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.