Командниот брод на украинската морнарица „Донбас“ гори во пристаништето во градот Мариупол. На социјалните мрежи се појавија фотографии на кои се гледа како густ чад се издига од неколку делови на командниот брод во Мариупол.

Се чини дека бродот претрпел сериозна штета при директен или индиректен удар. „Донбас“, кој има зафатнина од 5.520 тони, е поранешен советски брод кој украинската морнарица го преобрази во команден брод. Бродот беше запленет на Крим во 2014 година, но подоцна беше вратен во Украина.

Од народната милиција на Доњецката Народна Република (ДНР), соопштија дека украинската армија самата го запалила бродот.

Според нашите информации, украинските националисти продолжуваат со намерните обиди за уништување на бродови во пристаништето Мариупол. Откако го запалија турскиот брод „Азбург“, украинските милитанти тргнаа да организираат уште една провокација. „Паметните момци“ од 83-от Украински информативен и психолошки оперативен центар и националистите од „Азов“ го запалија командниот брод „Донбас“ – се вели во соопштението на ДНР.

Во него се додава дека од ДНР не исклучуваат дека „украинските и странските медиуми наскоро ќе почнат да шират видеа на кои се прикажуваат мртви членови на екипажите за да ги дискредитираат Руски трупи“.

Украинската морнарица загуби повеќе од 14 бродови од почетокот на војната во Украина. Повеќето од овие бродови беа запленети од руската армија.

Веќе во првите денови од војната, водечкиот украински брод „Хетман Сахајдачни“ беше потопен во бродоградилиштето во градот Николаев. Украинската морнарица ја потопи фрегатата за да спречи нејзино запленување или уништување од страна на руската армија.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.