Најмалку три лица загинаа во експлозија на камион на мостот што ги поврзува Крим и Русија, објави денеска рускиот Истражен совет.

„Се верува дека тоа се патници на автомобил кој бил покрај камионот што експлодирал. Телата на две жртви, маж и жена, веќе се извадени од вода и се утврдува нивниот идентитет”, соопшти Советот.

Инспекторите, исто така, утврдија детали за камионот и неговиот сопственик. Возилото е регистрирано во јужниот руски регион Краснодар и се бараат информации за сопственикот.

Руското Министерство за одбрана денеска соопшти дека руската армија на југот на Украина ќе продолжи да се снабдува со копнени и поморски коридори и покрај оштетувањата на Керчкиот мост, кој досега се користеше за овие цели.

Руските железници објавија дека железничкиот сообраќај преку мостот ќе продолжи во 20 часот по локално време.

Експлозија на стратешки важниот патен и железнички мост што го поврзува полуостровот Крим со Русија денеска урна дел од мостот со две коловозни ленти, поради што сообраќајот се одвива во еден правец.

Русија го зазеде Крим во 2014 година, а мостот долг 19 километри, кој го поврзува полуостровот со руската патна и железничка мрежа, го отвори рускиот претседател Владимир Путин четири години подоцна, возејќи камион.

Рускиот национален антитерористички национален одбор на социјалните мрежи објави дека експлозијата се случила во 6.07 часот во товарно возило, при што се запалиле седум вагони со резервоари за гориво, кои биле на пат кон полуостровот.

Две коловозни ленти на делот од мостот се урнаа, но теснецот што ги поврзува Црното и Азовското Море, не е оштетен, се вели во објавата на социјалните мрежи.

Сергеј Аксјонов, рускиот гувернер на Крим, на социјалните мрежи изјави дека мостот не е оштетен во еден правец, иако сообраќајот е прекинат за да се процени штетата.

Советникот на украинскиот претседател Володимир Зеленски на Твитер напиша дека инцидентот е „само почеток”, но не кажа дека украинските сили се одговорни за експлозијата.

Сè што е незаконско мора да биде уништено, се што е украдено мора да се врати во Украина, сè каде што е Русија мора да биде исфрлено, напиша советникот Михајло Подољак.

Портпаролот на Кремљ, Дмитриј Песков изјави дека рускиот претседател и наредил на Владата да формира државна комисија за да го истражи инцидентот.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.