Околу 7.000 иматели на странски пасоши од 60 земји чекаат да го напуштат Појасот Газа, соопшти денеска египетското Министерство за надворешни работи.

Министерството ги покани претставниците на странските амбасади на состанок во Каиро за да ги информираат за документите потребни за влез во Египет од палестинската територија разурната од војна.

Не е јасно дали 7.000 лица се само странски државјани или Палестинци со друг пасош. Исто така, не е јасно дали има други странци во Газа кои не сакаат да заминат.

Вчера стотици странски државјани и Палестинци со двојно државјанство ја напуштија Газа и влегоа во Египет за прв пат по избивањето на војната меѓу Израел и Хамас. Некои тешко повредени Палестинци, исто така, беа префрлени на лекување во Египет преку преминот Рафах.

Палестинската Црвена полумесечина синоќа соопшти дека примила уште 55 камиони хуманитарна помош, со што вкупниот број достигна 272 – сè уште мал дел од она што хуманитарците велат дека е потребно.

Израел го затвори Појасот Газа и врши воздушни напади врз густо населената област откако милитантите од исламистичката група Хамас, која управува со Појасот Газа, извршија терористички напад врз израелските заедници на 7 октомври во кој загинаа повеќе од 1.400 луѓе.

Околу 240 други беа земени како заложници во Газа. Министерството за здравство во Газа, кое го води Хамас, објави дека израелските сили убиле 8.796 луѓе, а раниле 22.219 во нападите врз Газа од почетокот на војната,објави Гардијан.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.