Од Здружението за заштита на животни „Анима мунди“ реагираат по последниот случај со нападнати граѓани од страна на бездомни кучиња и начинот на кој случајот бил пријавен од страна на јавна личност, како и начинот на кој тој случај бил решен. Станува збор за статусот во кој актерот Сашо Тасевски го објансува нападот на бесно куче-скитник кој ја искасал неговата мајка.

Нивното јавно обраќање до градоначалникот на Општина Аеродром Тимчо Муцунски ви го пренесуваме во целост:

Актуелниот градоначалник на Општина Аеродром мисли дека проблемот со бездомните кучиња се решава со нивно лишување од засолништа на минусни температури!

По притисок на одредени јавни личности и ширење омраза од јавноста спрема бездомните кучиња од Општина Аеродром оваа недела два бездомни миленици на жителите од Аеродром беа заловени од страна ЈП Лајка и сместени на безбедно во стационарот заради страв од понатамошни постапки што можат поединци да ги преземат бидејќи знаеме, докажано е, во какво општество живееме.

Истите тие кучиња ќе бидат спроведени за вдомување.

Ние го осудуваме начинот на кој целиот тој немил настан беше „пријавен“ од страна на јавна личност со користење на социјалните мрежи, што постигна само да се разбудат монструмите во нашата држава и да посегнат по животот на животни кои не по своја вина се на улица и не по своја вина немаат каде да живеат освен – на улица. Тие не се улични, туку бездомни.

Дополнително овој статус го поттикна градоначалникот на Општина Аеродром Тимчо Муцунски на минусни температури да им ги уништи засолништата на останатите бездомни кучиња во тој дел, куќарки за кои совесните жителите на Општина Аеродром вложиле да ги направат и да им обезбедат нешто пристојно каде што ќе можат да ја поминат зимата.

Наместо да го следи примерот на поранешни градоначалници кои донираа материјали и отстапуваа простор за активистите да направат куќарки за овие несреќни животни тој без трошка совест и хуманост постоечките ги фрли во отпад!

Ви се обраќаме лично градоначалнику, дали навистина мислите дека со отстранување на тие куќарки се решава проблемот со бездомните животни?

Дали вие сте градоначалник само на жителите во општината што мрзат животни?

Имајте на ум дека Општина Аеродром како една од најголемите општини во Скопје има и еден од најголемите проценти на љубители на животни.

Бараме градоначалникот на Општина Аеродром Тимчо Муцунски да ги замени овие куќарки со нови, подобри, на сметка на општината. Бараме општината да биде исто толку ефикасна и експедитивна за создавање, колку што беше за уништување на куќарките кои граѓаните со сопствен труд ги поставиле за да си ги заштитат маалските миленици.

Бараме градоначалниците на сите општини да ПРЕСТАНАТ ДА ВРШАТ ПРИТИСОК ВРЗ ЈП ЛАЈКА ЗА ЗАЛОВУВАЊЕ НА БЕЗДОМНИ ЖИВОТНИ БЕЗ СООДВЕТНИ ДОКАЗИ ЗА ПРИЈАВА НА АГРЕСИВНО КУЧЕ БИДЕЈЌИ СО ОВА СЕ ПОПРЕЧУВА ПРЕТПРИЈАТИЕТО ДА ЈА ВРШИ ГЛАВНАТА ДЕЈНОСТ И СПРОВЕДУВА ВО ЦЕЛОСТ ПРОГРАМАТА ЗА НАМАЛУВАЊЕ НА БЕЗДОМНАТА ПОПУЛАЦИЈА НА КУЧИЊА, ШТО Е ЕДИНСТВЕНО ДОКАЖАНО ЕФИКАСНО РЕШЕНИЕ.

Нашето здружение со својата експертиза и долгогодишно искуство се става на располагање повторно, како и многу пати низ годините, да достави предлози и ефективни решенија како општината може да придонесе за намалување на бројот на бездомни животни.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.