Претседателскиот кандидат, Максим Димитриевски денеска се обрати пред граѓаните на Кичево.

Храбриот човек умира еднаш, а плашливиот умира секој ден. Јас не сакам да умирам секој ден, а верувам и вие – рече тој во почетокот на обраќањето.

Сакам да упатам неколку пораки. Прво, дека доколку станам Претседател на Македонија, ќе ставиме крај на монолитното веење на знамињата низ цела Мaкедонија. Оваа држава има државно знаме, а ќе ги почитуваме сите. Мора да се почитува тоа што е напишано согласно уставот и законите. Второ, никогаш нема да се сложам со уставни измени кои го редефинираат изборот на Претседателот на државата, со избор во парламентот, а не од страна на граѓаните. Затоа што тој својата сила и улогата на фактор за стабилност ја има од силата што ја црпи од граѓаните. Тие му ја даваат моќта на Претседателот, а политичките партии му ја одземаат и го релативизираат. Македонија заслужува да има Претседател којшто ќе излезе од граѓаните и ќе се грижи за граѓаните – додаде Димитриевски.

Тој рече дека граѓаните на Кичево најдобро знаат низ што поминувале сите овие години и продолжи:

И ако сметате дека треба да ги поддржите оние што се вртат во круг 30 години, а никој не размiслува за граѓаните и националните и државните интереси, тогаш почитувани, продолжете така. Но, јас мислам спротивно од тоа. И оваа, а и претходната власт треба да се казни. Дали има можност во Македонија за прв пат да се гласа за, а не против. Има. Тоа е Движењето ЗНАМ – За наша Македонија – потенцира Димитриевски.

Тој рече дека нема да потклекне на скриени барања, од страна на поединци, коишто сакаат да реализираат национални стратегии.

Македонија единствено може да биде држава на сите нејзини граѓани, но притоа столбот на државата го поставија нашите предци, Македонците, заедо со останатите кои живеат на овие простори, рече Димитриевски и потенцира дека ќе го даде својот максимум за Македонија, за нашиот народ и за секој граѓанин и да градиме реално мултиетничко општество во кое сите имаат еднакви права, но имаат и еднакви обврски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.