Резултати се очекуваат и од Македонија и од Бугарија, изјави министерот надворешни работи Бујар Османи во интервју за бугарската агенција БТВ во пресрет на официјалната посета на владиниот тим предводен од премиерот Димитар Ковачевски на Софија каде утре ќе се одржи заедничка седница на владите на двете земји.

Османи, во интервјуто оценува дека е одлична порака што на првиот работен ден на новата македонска Влада првата посета ја оствари бугарскиот премиер Кирил Петков, бидејќи тоа носи и симболика и суштина.

Симболиката е дека ние сме најблиски соседи, но суштината е дека во позитивна, конструктивна атмосфера, во атмосфера на лична доверба, создадена е платформа за продолжување на разговорите – објасни Османи.

Според Османи, во односите меѓу Софија и Скопје се очекуваат резултати и од двете страни.

Патната врска меѓу Скопје и Софија не може да биде обврска само на Македонија – вели Османи, додавајќи дека нашата обврска е до Крива Паланка и дека граничниот премин Клепало од македонска страна е завршен, а се очекува бугарската страна да го заврши својот дел.

Во однос на работата на Заедничката комисија за историски и образовни прашања, Османи посочува дека Македонија досега смени двајца свои претставници во ова тело, додавајќи дека Бугарија не го променила својот состав. Тој вели дека Софија можеби би требало да го искористи ова наше искуство.

И двете држави имаат интерес комисијата да биде продуктивна – додава шефот на дипломатијата.

Прашан како гледа на вклучувањето на македонските Бугари како народ во Уставот на Македонија, министерот Османи вели дека не гледа ништо проблематично во вклучувањето на која било друга етничка заедница и во нејзино интегрирање, но и во покажувањето одговорност и лојалност кон државата. Тој како пример го наведе Рамковниот договор, кој им донел придобивки не само на Албанците, Турците, Србите, Власите, Ромите, а можно е, вели, и Бугарите да станат дел од него.

Во врска со испраќањето македонски амбасадор во Бугарија, министерот за надворешни работи вели дека планот е во првите недели од мандатот новата Влада да донесе одлука и да испрати амбасадор во Софија.

Се уште немаме утврдено име, но имаме идеи и размислувања на темата, се надевам дека во наредните денови јас како министер ќе дадам предлог – додава Османи.

Прашан за „рехабилитација на македонските Бугари жртви од југословенскиот режим“, Османи вели дека во 2006 година Собранието усвои Декларација со извинување до семејствата на жртвите од комунизмот. Тој вели дека Скопје сега е подготвено да ги реализира практичните аспекти на Декларацијата, како пристап до архивите и потоа отворање поединечни случаи, се додека има потреба да се разговара за нив, па дури и да се процесуираат доколку постои законска можност за тоа.

Според Османи, целта е да се спречи ова прашање да стане мит и да не се користи во ничија политичка агенда.

Не мислам дека македонското општество бега од прашањето и ние сме подготвени да го започнеме овој процес – вели Османи во интервјуто за БТВ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.