Момче од Битола на возраст од 24 години вчера доцна попладнето починало во Битолската клиничка болница, откако било примено со многу висока температура и трески. На почеток било згрижено на одделот за Интензивна нега, и биле консултирани конзилијарно и лекари од други одделенија, но од час во час состојбата се влошувала, па по речиси десет часа од хоспитализацијата починало, пренесе Независен.

Официјално, директорката на Битолската клиничка болница, д-р Елизабета Ивановска за „Независен“ потврдува дека момчето претходниот ден, во вторникот, било лекарски третирано и му била дадена терапија и било пуштено дома, но ноќта меѓу вторникот и средата повторно имало висока температура и влошување на состојбата, што било причина да се врати на болница и да се хоспитализира. За жал, имало лошо наоди на направените лабораториските анализи.

Момчето е примено во болницата вчера утро, претходно било високо фебрилно дома седум дена, не било лекувано, не се јавило на лекар. Претходниот дел дошло на Инфективно, земени се брисеви, лабораторија и пуштено дома со терапија. Но, ноќта повторно било високо фебрилно и вчера сабајле доаѓа на Интерно, контактибилно, но имаше многу лоши наоди од лабораторија. Го зедоа во службата за анестезија, бидејќи имаше целосен дисбаланс во организмот. Таму беше до 18 часот, но состојбата се влошуваше од час во час. Комплетно беше третирано со направени анализи на компјутер, глава, абдомен, торакс, повикани конзилијарно лекари од други одделенија на болницата. Го прегледаа доктори од Неврологија, Инфектологија, ОРЛ, Хирургија, Очно и други одделенија. За случајот повикавме да се направи обдукција, за и ние како лекари да знаеме која беше причината за смртта“, изјави д-р Ивановска за „Независен“.

Во соопштението од битолската полиција за овој настан се вели дека станува збор за С.Т. од селото Цапари, кого во болницата го донесле родителите.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.