Со спектакуларно шоу на Фламенко балетот „Луксуриа“ од Шпанија, фестивалот „Охридско лето“ вчеравечер на Античкиот театар го прослави 62-от роденден.

Бројни љубители на уметноста уживаа во ритамот и емоцијата на музичарите и танчерите од шпанскиот Фламенко балет „Луксуриа“, во одличната кореографија и перфектната изведба.

На почетокот на концертот се обрати Амбасадорот на Кралството Шпанија во Република Македонија, Хозе Луис Лозано Гарсија.

Амбасадата на Шпанија е спремна да продолжи со зајакнување на одличните односи со оваа пријателска земја Македонија, зајакнување на културните односи меѓу нашите две земји, и поконкретно со прекрасниот град Охрид,  рече амбасадорот Хозе Луис Лозано Гарсија.

Директорката на Фестивалот, Наташа Поповиќ, истакна дека огромна е почитта кон сите кои ги вложија своите напори и направија летните фестивалски вечери веќе 62 години да бидат вистинско уживање за љубителите на високата уметност.

Денеска ги славиме годините испишани со богата историја со славни имиња од светската музичка елита и врвните театарски креации. Денеска ја празнуваме уметноста, рече Поповиќ.

Фламенко балетот „Луксуриа“ на публиката по повод 62-от роденден на фестивалот „Охридско лето“ ѝ приреди незаборавна вечер донесувајќи на сцената  свет исполнет со напнатост, интриги, љубов, страст, лојалност и трагедија, но и нови иновативни комбинации на традиционалното и модерното фламенко.

 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.