Претставата „Сите сме птици“ е приказна за една битка помеѓу идентитетот на групата и искрената потреба за индивидуалност. Ова е претстава за меѓуетничка толеранција и недостатокот на истата, вели актерот Дамјан Цветановски (28) кој ја толкува главната улога во „Сите сме птици“ чија премиера е закажана за в сабота, 17 декември (20 часот), на големата сцена на Македонскиот народен театар (МНТ).

Автор на текстот е либанско-канадскиот автор Важди Муавад, а режијата е на реномираниот Слободан Унковски, кој по пауза од девет години повторно режира во Националниот театар.

Дамјан Цветановски и Сара Климовска

Ова е претстава за етикетите што нè одредуваат кои сме и што сме уште пред да ја добиеме потребата за нешто ново и поинакво, вели Цветановски, кој го толкува ликот на Еитан.

Во драмата, додека во светот се случува израелско-палестинскиот конфликт и нападите, едно семејство е во теснец и е принудено да се соочи со сето она што го знаат за својот идентитет. Поради терористичкиот напад во Ерусалим младиот израелско-германски генетски истражувач Еитан паѓа во кома, додека неговата девојка Вахида (Американка со арапско потекло) е оставена да ја открие неговата семејна тајна…

Ликот на Еитан е младо момче од еврејска фамилија кој го посветува животот на изучување и истражување на генетиката. Момче кое сè во својот живот перцепира низ својата научна леќа, вистината за него е секогаш практична и аргументирана со факти. Но кога птиците на случајноста ќе го втурнат во еден поинаков свет, исполнет со магија, религија и љубов, тој мора да научи да го гледа животот на еден нов, поинаков начин, вели Цветановски.

Звездана Ангеловска, Емил Рубен, Дамјан Цветановски, Никола Ристановски и Николина Кујача во „Сите сме птици“

Како завршува приказната и што има на тој пат?

Не би било фер да кажам како завршува таа приказна, но можам да кажам дека тој пат е исполнет со многу јаки ставови и чувства, неизбежно испреплетен со драмите и животните приказни на сите членови од фамилијата на Еитан, објаснува Цветановски.

Тој е дел од ансбамлот на Драмски театар, а во МНТ гостува по четврти пат, по „Разговор во четири очи“, „Галеб“ и „Еден месец на село“.

Овој пат радоста е поголема, бидејќи улогата е насловна, но и притисокот и одговорноста сразмерно се поголеми. Се надевам на успех и задоволна публика, вели Цветановски.

Го прашавме Цветановски дали секоја генерација го става товарот на следната и додава по уште еден камен за да биде потешко?

Сè што досега ми се случило во кариерата го чувствувам како последица на претходниот проект, вели Цветановски

Мој личен став е дека секоја следна генерација има обврска да препознае што од тоа што го правела претходната генерација е вредно за чување и негување. Исто така, нивна обврска е да препознаат што е веќе старо и непотребно во денешницата и полека да се ослободуваат од работите кои нè држат во место или во полош случај, не уназадуваат, вели Цветановски.

Младиот и надежен актер во досегашната кариера, меѓудругото има работено со Нина Николиќ („Галеб“), со Паоло Маџели („Еден месец на село“), со Доналд Ворен Мофет („Несоодветно за на работа“), со Зоја Бузалковска („Чудна случка со кучето во ноќта“).

Сè што досега ми се случило во кариерата го чувствувам како последица на претходниот проект. Имам чувство дека ако продолжам да имам љубов и волја за оваа работа, причински-последично ќе се нижат нови и нови проекти. За сега тоа е сè што сакам од мојата кариера. Можеби, еден ден ќе сакам малку да забавам со темпото кое моментално го држам, но засега таа желба се нема појавено. Би сакал малку повеќе работа на филм, тоа е еден простор кој сè уште го немам доволно истражено и освоено, вели Цветановски.

Цветановски е дел и од импрув групата НАСТАП.

Драмски е мојата матична куќа, местото каде што можам да го развивам мојот актерски израз без да го чуствувам стравот дека тој проект ми е последен. Тоа ми носи едно чувство на сигурност кое е опасно исто колку што е убаво. Не смеам да се „улежам” во сопствената удобност. Импров групата НАСТАП е мојата фамилија, тоа е еден склоп на прекрасни луѓе и актери со кои сум втурнат да го истражувам помалку и страшниот простор наречен импровизирање пред публика. Тоа е една исклучително храбра група на актери и ми е чест да ја делам сцената со секој од нив. Иднината ќе донесе тоа што ќе донесе, јас имам контрола колку што можам, другото е на птиците на случајноста…, завшрува Цветановски.

Цветановски: Иднината ќе донесе тоа што ќе донесе, јас имам контрола колку што можам, другото е на птиците на случајноста…,

Освен Цветановски, во претставата уште играат и Сара Климоска, Тина Трпкоска, Звездана Ангеловска, Николина Кујача, Емил Рубен, Никола Ристановски, Петре Арсовски, Сашка Димитровска и Драгана Костадиновска.

Текстот од француски на македонски јазик го преведе Калиопа Петрушевска, а драматург е Јелена Мијовиќ. Сценографијата на претставата е на Бранко Хојник, костимограф е Роза Трајческа-Ристовска и композитор е Ирена Поповиќ-Драговиќ.

Следните изведби се закажани на 20 и 21 декември, како и на 30 и 31 јануари со почеток во 20 часот.

Разговараше: Александра М. Бундалевска

фото: Кире Галевски



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.