Вицепремиерот за економски прашања, Фатмир Битиќи, во врска со тендерот за универзалниот снабдувач за електрична енергија, изјави дека во тект на денот ќе се отвораат понудите и ќе се оценува дали ги исполнуваат условите.

Тој додаде дека не знаат кој се може да аплицира.

Одговорајќи на новинарски прашања, Битиќи оцени дека пониската маржа може да ги намали сметките за струја на граѓаните.

Денеска ќе има отворање на понудите, ќе се направи административна проверка дали ги исполнуваат условите тие што аплицирале. Не знаеме кој се е можно да аплицира. Потоа ќе се закаже негативно наддавање и аукција. Мислам дека веќе во наредните 10 дена би требало да знаеме. Пониската маржа која влегува во конечната цена за крајните корисници би требало да ги намали цените и тоа е една од идеите. Ние правиме напори со сите инвестиции во обновливи извори и во трансформацијата кон „зелена енергија“, граѓаните да добијат што пониски цени на струјата како крајни корисници, истакна Битиќи.

Тој вели дека се знае кои се јавните институции поврзани со критиките од ЕУ за наводни злоупотреби на европските пари, но, тие нема да бидат откриени додека не завршат предиситражните постапки кои се во тек.

На универзалниот снабдувач „ЕВН Хоум“ на 30 јуни 2024 година му истекува петгодишниот договор за снабдување со електрична енергија на потрошувачите на регулираниот пазар. Поради тоа, Владата на 11 декември 2023 година објави јавен повик за избор на нов универзален снабдувач што ќе треба во наредните пет години, почнувајќи од 1 јули 2024 година, да ги снабдува со струја потрошувачите на регулираниот пазар.

Предвидено е изборот да се изврши преку електронска аукција на која услов е да се понуди профитна маржа пониска од 11,5 отсто, колку што изнесува маржата на досегашниот универзален снабдувач „ЕВН Хоум“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.