Нестабилност проследена со пороен дожд, грмежи и силен ветер во моментов има во северозападните делови од Македонија.

Од УХМР најавија дека попладне и во ноќните часови почнувајќи од запад облачноста во земјава ќе се зголемува и ќе биде нестабилно со пороен дожд и грмежи.

Наместа процесите ќе бидат во форма на невреме со интензивен пороен дожд за кратко време (над 20 l/m2 за 6 часа), силен ветер, поинтензивни електрични празнења и услови за појава на град.

Управата за хидрометеоролошки работи предупреди дека поради невремето со интензивен дожд за кратко време, силен ветер, поинтензивни електрични празнења и услови за појава на град, можно е да дојде до поројни истекувања на помалите водотеци и суводолици и до несакани излевања на водите, кои би можеле да предизвикаат локални проблеми како на крајбрежјето, така и на патната инфраструктура, на одредени места можна е и појава на свлечишта и одрони.

Од утре и во почетокот на новата работна седмица следува стабилно и посвежо време со умерен, повремено засилен ветер од западен и северозападен правец.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.