Според официјалната агенда, Комисијата за надворешни работи на турскиот Парламент в четврток ќе расправа за предлог-законот со кој се одобрува членството на Шведска во НАТО.

Шведска денеска објави дека ја поздравува таквата одлука и дека „со нетрпение очекува да биде членка на НАТО“.

Претседателот на Турција, Реџеп Тајип Ердоган го поднесе предлог-законот до Парламентот на ратификација пред три недели, а на почетокот на месецот најави дека што е можно повеќе ќе се обиде да ја олесни ратификацијата.

Турција досега ја блокираше ратификацијата, наведувајќи дека Шведска не се ангажирала доволно во екстрадиција на осомничени за тероризам во Анкара.

Предлогот мора да биде одобрен од парламентарната Комисија за надворешни работи пред да биде изгласан во Меџлисот, по што мора да биде потпишан од Ердоган.

Министрите за надворешни работи на НАТО ќе се сретнат во Брисел на 28 и 29 ноември.

Шведска и Финска аплицираа за членство во НАТО во мај минатата година. Финска стана членка на Алијансата во април, додека членството на Шведска треба да биде ратификувано од унгарскиот Парламент.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.