Русија на 11 август почнува со евакуација на село на далечниот исток на земјата, како подготовка за лансирањето на првата руска мисија за слетување на Месечината. Ова ќе биде прво лансирање на руско летало на Месечината по 1976 година, објави руската вселенска агенција Роскосмос.

Жителите на селото Шахтински во руската област Хабаровск, југоисточно од местото на лансирање, ќе бидат евакуирани рано наутро в петок, бидејќи селото се наоѓа во област каде што се предвидува дека ќе паднат ракетните стабилизатори по лансирањето.

Месечевото летало „Луна-25“ ќе биде лансирано од космодромот „Восточни“ којшто се наоѓа на околу 5.550 километри источно од Москва. Во соопштението се додава дека тоа ќе биде првото вселенско летало што ќе слета на јужниот пол на Месечината и дека целите на мисијата се развивање технологии за меко слетување, истражување на внатрешната структура на Месечината и барање ресурси, како вода и друго.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.