Кремљ ги обвини САД и НАТО за ескалација на тензиите откако Алијансата соопшти дека ја зајакнува одбраната во источна Европа поради кризата во Украина.

Портпаролот на Кремљ, Дмитриј Песков, рече дека Вашингтон и НАТО ги ескалираат тензиите преку „информативна хистерија“ и „конкретни акции“, додавајќи дека ризикот од офанзива на украинските војници против проруските сепаратисти е „многу висок“.

Сакам да нагласам дека сето ова не се случува поради она што го правиме ние, Русија. Сето ова се случува поради акциите на НАТО и САД и поради информациите што тие ги шират, рече Песков.

Тој истакна дека активноста на НАТО во близина на руските граници не може да биде игнорирана од руската војска.

Таквите акции и зголемената активност на НАТО во близина на нашите граници не можат да бидат игнорирани од нашата војска, која е одговорна за безбедноста на нашата земја, рече портпаролот на Кремљ.

Сепак, тој предложи прашањето дали учеството на Балтичката флота во вежбите може да се смета како реакција на прераспределбата на силите на НАТО во Источна Европа и балтичките земји, да се упати до Министерството за одбрана.

Во моментов во тек е процес на вежби, маневри и воена конструкција, кој никогаш не престанал и ќе продолжи, нагласи Песков.

Сојузниците од НАТО денеска ја ставија својата армија во состојба на готовност и ќе испратат дополнителни бродови и борбени авиони во нивните бази во Источна Европа, зајакнувајќи ги силите и одбраната, во време, како што истакна НАТО, „кога Русија продолжува да распоредува војници во близина на украинската граница“.

Претходните денови бројни членки на Северноатлантската алијанса објавија проценки за актуелната состојба или претстојното распоредување на силите, се наведува на сајтот на НАТО.

Данска испраќа фрегата во Балтичкото Море и е подготвена да испрати четири авиони Ф16 во Литванија, како поддршка на мисијата на НАТО во регионот.

Шпанија ќе испрати бродови да им се приклучат на поморските сили на НАТО и размислува да испрати борбени авиони во Бугарија.

Франција ја изрази својата подготвеност да испрати војници во Романија под команда на НАТО.

Холандија, исто така, испрати два авиони Ф35 во Бугарија од април за да им помогне на активностите на НАТО во регионот и ќе ги стави брод и копнените единици во подготвеност.

САД, исто така, информираа дека размислуваат за зголемување на своето воено присуство во источното крило на Алијансата.

Генералниот секретар на НАТО, Јенс Столтенберг, рече дека ги поздравува напорите на сојузниците да и стават на располагање дополнителни трупи на Алијансата.

НАТО ќе продолжи да ги презема сите неопходни мерки за заштита и одбрана на сите сојузници, истовремено зајакнувајќи го источниот дел на Алијансата. Ние секогаш ќе одговориме на секое влошување на безбедноста во нашето опкружување, рече Столтенберг, а пренесува веб-страницата на НАТО.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.