Градежната компанија „Ремис“ од Охрид, која претендира да гради поголем број на станбени објекти во кругот на поранешната фабрика „Треска“ во центарот на Скопје, ја зголемила основната главнина со паричен влог од 14 милиони евра, објави Фактор.мк.

Промената во Централниот регистар покажува дека има 834.256.336 денари уплатен дел на сметката на „Ремис“. Останува да се види дали „Ремис“ планира да ги користи средствата за уплата на потребните комуналии или пак за инвестициски активности.

Еден од содружниците, Предраг Виксентијевиќ, кој наедно е и сопственик на поголемиот дел од земјиштето, иајзви дека се уште не е ништо испланирано докрај и дека, како што рече за Фактор.мк, тој е само еден од сопствениците на „Ремис“ со помал удел во компанијата.

Откако поголем дел од просторот на напуштениот индустриски капацитет беше вратен со денационализација на семејството Виксентијевиќ од Скопје, градежните фирми почнаа да фаќаат позиции на теренот, каде што според деталниот план имаше градежни маркички за 30 згради.

Летово ќе почне со изградба првата зграда во кругот на фабриката „Треска“

Инаку, Општина Центар ја издаде првата градежна дозвола за кругот на поранешната фабрика „Треска“ во центарот на Скопје, по што се очекува набрзо да започне и изградбата на првиот објект.

Издадено е едно правосилно Одобрение за градење за правните лица Голден Арт и Мега Акустик, информираат од општината.

Фирмите „Голден арт“ и „Мега акустик“ претходно ги уплатија комуналиите во висина од 800.000 евра на Град Скопје и Општина Центар за изградба на станбено-деловен објект.

Инаку станува збор за простор од повеќе од 60 илјади квадратни метри во рамки на ДУП „Буњаковец“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.