Премиерот Димитар Ковачевски, вели дека е набавен гас од „Макпетрол“ за цел декември за потребите на топланите во Скопје, а за декември е потпишан и договор за користење на топлинската енергија од ТЕ-ТО за затоплување на системот.

Вчера се водеа разговори со менаџерскиот тим на „Скопје Север“ и сметам дека по потпишувањето на договорот за деловно техничка соработка со ЕСМ сите граѓани во Чаир и Бутел ќе добијат затоплување преку ЕСМ како што добиваат и сите други граѓани досега во градот Скопје, изјави Ковачевски на прес-конференција во Владата одговарајќи на новинарско прашање.

Тој изрази жалење за тврдењата во медиумите дека навреме не е набавен гас за декември.

Гасот беше набавен и пред шпекулациите кои се појавија во медиумите. Жал ми е што одредени медиуми извадија наслови дека нема гас иако имаа одговор на новинарско прашање дека е набавен, но тука не можам да влијаам ниту некогаш сум се амбицирал да влијаам, посочи Ковачевски.

Тој повтори дека гас ќе се набавува на 30 дена со оглед на фактот што така одат и продажбите со котации од минатиот месец и со движењето на он спот цените на берзата за тековниот месец при што финалната пресметка се прави на крајот од месецот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.