Комисијата за правни прашања и човекови права на Парламентарното собрание на Советот на Европа (ПССЕ), на седницата која се одржува на 30 ноември и 1 декември во Париз, го реизбра Александар Николоски за генерален известувач за укинување на смртната казна. Ова му е втор мандат на оваа позиција. Инаку, мандатот трае една година.

Притоа, Николоски пред Комисијата презентираше информативна белешка во која беа опфатени случувањата од последната дискусија на оваа тема во декември 2021 година, вклучувајќи го временскиот период кога за првпат беше избран на оваа позиција.

До денес, повеќе од две третини од земјите (144) ширум светот ја укинале смртната казна со закон или повеќе не ја применуваат, додека 55 земји продолжуваат да ја користат – рече Николоски.

Тој забележа дека одреден напредок кон укинување на смртната казна е забележан во последните месеци во светот, но сè уште е нецелосен. Смртната казна е сурова, нечовечка и понижувачка казна која е спротивна на Европската конвенција за човекови права. Нејзината забрана е основен принцип на Советот на Европа.

Николоски истакна дека Парламентарното Собрание на Советот на Европа треба да игра улога преку споделување на својата експертиза и практика за укинување на смртната казна со другите делови на светот. Ние, подвлече Николоски, треба да продолжиме со нашите напори за целосно да ја искорениме смртната казна од нашиот континент.

По неговиот реизбор за генерален известувач, Николоски истакна дека ќе продолжи да ги следи случувањата во земјите споменати во информативната белешка и ќе ги осудува новите егзекуции и новите смртни пресуди.

На крај, Николоски побара да се декласифицира неговата информативна белешка за да ја направи достапна за јавноста, како и да организира расправа со експерти на идниот состанок на Комисијата. Сослушувањето ќе биде фокусирано на земјите набљудувачи (Јапонија, САД) и темата за условите на притвор на осудените на смрт.

Комисијата изврши одделни интервјуа и со тројцата кандидати – Мајкл О Флаерти од Ирска, Манфред Новак од Австрија и Меглена Кунева од Бугарија, за функцијата комесар за човекови права на Советот на Европа.

Во рамките на седницата на Комисијата, се дискутираше и за Процесите на репарација и помирување за надминување на минатите конфликти и изградба на заедничка мирна иднина – прашање на правична и еднаква штета и за Спротивставување на стратешките тужби против учеството на јавноста (СЛАПП), како манипулација на судскиот систем, со што се поткопува неговата вродена заштитна улога со негова злоупотреба.

Имаше и сослушување на Евгенија Кара-Мурза, сопруга на опозицискиот руски активист и координатор за застапување и Бил Бровдер, шеф на Кампањата за правда на Сергеј Магнитски, од Обединето Кралство, во врска со санкциите за лицата на „Кара-Мурза листата“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.