СДСМ ја започна постапката за утврдување на кандидат за претседател на државата за претседателските избори оваа година, соопшти денеска портпаролот на партијата Богданка Кузеска, додавајќи дека како партија со „најголема внатрепартиска демократија во земјава СДСМ спроведува транспарентна и демократска постапка за избор на најдобриот кандидат“.

СДСМ го избира победничкиот кандидат кој ќе биде иден Претседател на Републиката, рече Кузеска.

Во тек е веќе номинацијата на можни кандидати за претседател на државата во рамки на месните одбори во општинските организации на СДСМ. Дополнително, отворен е и јавен повик за самокандидирање, преку оглас во дневни весници на македонски и албански јазик.

Со сите документи и формулари од денеска јавниот повик е достапен и на официјалната интернет страница на СДСМ.

Кузеска додаде дека како партија даваат можност за самокандидирање и на личности кои не се од СДСМ, но „ги споделуваат социјалдемократските вредности“.

Сите кандидати мора да ги исполнуваат највисоките критериуми. Да имаат висок општествен углед и кредибилитет, да уживаат доверба од членството, симпатизерите. Да ги делат вредностите на социјалдемократијата, да ги почитуваат посебностите на сите наши граѓани без разлика на верска и етничка припадност и да се обврзат на неуморна работа за меѓународниот углед на татковината и исполнување на уште една стратешка и национална цел: членство во ЕУ. Сите кандидати мора да го прифатат, да го почитуваат и да се придржуваат кон Кодексот за однесување на членовите и функционерите на Социјалдемократскиот сојуз на Македонија. Нашите вредности не дефинираат и не разликуваат од антиевропските и недемократски партии како ДПМНЕ и Левица. Ги повикуваме сите кои ги исполнуваат критериумите и кои се заинтересирани да се пријават. За текот на процесот ќе ја информираме јавноста. СДСМ ќе го има новиот претседател на државата, СДСМ ќе ја формира иднината проевропска Влада и заедно ќе ја внесеме земјата во ЕУ во новиот мандат, рече Кузеска.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.