Вицепремиерот за европски прашања Бојан Маричиќ не успеа повторно да добие столче во македонскиот Парламент, откако неговата СДСМ во Изборната единица 1, во која тој беше четврти на листа, со добиени 25.730 гласа, зеде само три мандати – коносителите на листата лидерот на партијата Димитар Ковачевски и лидерката на ЛДП Моника Зајкова, како и Даниела Николова, која и досега беше пратеничка на СДСМ.

Маричиќ предмалку преку „Фејсбук“ им го честиташе на победниците за успехот, а на граѓаните и на институциите за демократските и мирните избори.

Тој додаде дека СДСМ како опозиција ќе биде постојано тука за потребите на развојот, да иницираат но и го поддржат тоа што им треба на граѓаните.

Јас лично, со цел свој капацитет, со цела своја енергија, посветеност и знаење, ќе се вложам во заздравувањето и реформите на СДСМ како партија која искрено ја сакам и со гордост и припаѓам, бидејќи во овој момент каузите за кои целиот свој живот сум се борел се загрозени и со ослабена подлога и база, наведува Маричиќ.

Маричиќ за СДСМ: Во моментов каузите за кои цел живот сум се борел се загрозени и со ослабена подлога и база

Инаку, СДСМ, како втора најголема македонска партија, освои речиси тројно помалку пратенички места од ВМРО-ДПМНЕ.

Во ИЕ 2 мандат освоија само Оливер Спасовски и Фатмир Битиќи, додека партијата најлошо помина во шестката, каде пратеничко место доби само досегашната министерка за одбрана Славјанка Петровска.

Славјанка обезбеди мандат само за себе: Кој влегува во Собранието од ИЕ 6?

Во ИЕ 3 носителката Сања Лукаревска освои 4 мандати, заедно со Љупчо Николовски, Горан Мисовски, Благој Бочварски. Најдобро помина поранешниот министер за здравство Венко Филипче кој во ИЕ 4 освои 5 мандати. Од тука како пратеници на опозициона СДСМ влегуваат и  Јованка Тренчевска, Миле Талевски, Соња Мираковска и Борче Цветков.

Слабо помина и претседателот на Собранието Јован Митрески, кој со својата коносителка на листата во ИЕ 5, министерката за култура Бисера Костадиновска Стојчевска освоија 3 мандати. Нив ќе им се придружи помалку познато име за македонската јавност – Митко Трајчулески.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.