Претседателот на Владата на Република Македонија, Димитар Ковачевски, заедно со министерот за финансии, Фатмир Бесими, денеска оствариле средба со делегација од Меѓународниот монетарен фонд предводена од шефот на мисијата на ММФ за Република Македонија, Жак Миниан, новиот шеф на мисијата за Република Македонија, Анет Кубе и алтернативниот извршен директор на Мисијата, Лук Дресе.

Досегашната соработка на Република Македонија со ММФ, соопштија од владината прес-служба,  била во фокусот на денешната средба, а заеднички биле потврдени заложбите на двете страни, соработката да продолжи и во иднина.

Премиерот Ковачевски, во име на Владата, се заблагодарил што ММФ ги препознава и поддржува владините економски политики и за континуираната поддршка на земјава, со која оваа меѓународна финансиска институција има значителен придонес во зајакнувањето на политиките и усогласувањето на правните и регулаторни рамки со стандардите на ЕУ, што е клучно во процесот на пристапување на земјава кон европското семејство.

– Премиерот Ковачевски истакна дека главна определба на Владата на среден рок е постигнување одржлив економски развој, фискална консолидација и спроведување на структурните реформи. Тој потенцираше дека само стабилни јавни финансии можат да обезбедат долгорочен раст и развој на земјава, подобрување на животниот стандард на граѓаните, што е клучно државата да се движи напред на патот на евроинтеграциите, се наведува во соопштението од Владата.

На средбата заеднички било констатирано дека ММФ ќе ги поддржи заложбите на Владата за понатамошно намалување на буџетскиот дефицит, борбата против инфлацијата, заштитата на финансиската стабилност, подобрувањето на животниот стандард со зголемување на инвестициите, растот на продуктивноста и забрзувањето на зелената транзиција.

Средбата била одржана по завршување на Мисијата на Меѓународниот монетарен фонд во земјава за членот IV во Република Македонија.

Овие мисии, појаснуваат во соопштението од Владата, се одржуваат еднаш годишно, во рамки на кои се скенираат макроекономската рамка, како и управувањето со фискалната и монетарната политика



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.