Полицијата останува да помага во затворот „Идризово“, кој сè уште е во кризна состојба по неколкуте скандали и бунтови на затворениците. Министерот за внатрешни работи, Оливер Спасовски, одговарајќи на новинарско прашање денес по посетата на полицискиот центар за обука во близина на затворот, се пофали дека откако полицијата ги чува влезовите, намален е бројот на разбојништва и на бегства од затворот.

Таму работиме заедно според оперативен план направен со службата на ‘Идризово’ и со Армијата во делот на обезбедувањето поради состојбата со намалување на кадарот на полициските службеници во затворот, што влијае на оваа ситуација. Целосно под контрола е сè она што е под контрола на МВР, односно влезовите, сè што влегува е контролирано на високо ниво. Од моментот на кризната состојба, откако постапуваме во ‘Идризово’, драстично се намали бројот на извршување на разбојништва и на кражби и на територијата и на општина Гази Баба, но и на територијата на градот Скопје, што укажува на аномалиите што ние претходно ги утврдувавме со нелегално излегување лица од затворот – рече министерот Спасовски.

Полицијата ќе остане во затворот „Идризово“ сè додека има потреба оти, како што нагласи министерот Спасовски, се работи за безбедноста, а оваа институција мора да биде целосно под контрола за да бидат безбедни и сите граѓани.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.