По четири часа разговори заврши лидерската средба на која била отворена дискусија за уставните промени, но не биле донесени конкретни заклучоци, иако од страна на Владата имало предлог околу кои позиции да се усогласат политичките лидери. Премиерот Димитар Ковачевски во изјавата за новинарите порача дека никој не треба да биде кочничар на државата и дека, иако не постигнале консензус, клучно е што се сретнаа.

Пред нас стојат многу предизвици и затоа важна е деблокадата на Собранието за да се донесат важни реформи. Не смееме да дозволиме уставните измени да бидат пречка која сами ќе си ја поставиме. Да бидеме мудри и да го искористиме поволниот момент во ЕУ. Не е време за поделби. Ќе се формира собраниска група која ќе се грижи реформите да не стојат во место. Првиот приоритет е европскиот пат па интересите на политичките партии. Никој нема да биде кочничар, рече Ковачевски по лидерската средба во Собранието која ја иницираше тој, а ја прифатија речиси сите политички партии.

На средбата сите лидери ги изнеле, според Ковачевски, ставовите со кои настапуваа пред јавноста претходно и биле демократски сослушани. Се зборувало и енергетската криза, за владеењето на правото, за борбата против криминалот и корупцијата, но и за блокираните закони во Собранието.

Вложивме многу труд да дојдеме до оваа фаза. Конечно после 17 години гордо можеме да кажеме дека сме земја која ги започна преговорите со ЕУ. Имавме многу предизвици, требаше да се носат тешки одлуки. Но, истовремено знаевме која е целта – НАТО И ЕУ, две стратешки цели кои сме должни да ги исполниме, изјави тој.

Додаде дека земјава „последните пет години направи крупни чекори и успеа да се докаже како достоен НАТО и ЕУ партнер“.

Еден од тие чекори беше и европскиот предлог кој го добивме летово, за време на француското претседателство. Свесни за сите негови предности и слабости го препознавме како можност за деблокирање на процесот и придвижување напред. И самите бевте сведоци, го усвоивме во Собранието во атмосфера на тешка седница, тензии и недоверба, рече Ковачевски.

Премиерот додаде дека заклучоците донесени во Собранието гарантираат почеток на преговорите со ЕУ и скрининг процесот со гарантиран јазик и идентитет и гаранција дека историските прашања се надвор од преговарачката рамка.

Отворањето на преговорите е огромен успех за сите нас. Процесот е конечно започнат и сега е важно да напредуваме во реформите, заради граѓаните и заради градење на европски институции кои ќе работат по европски стандарди и принципи. Низ преговорите ќе ни се отвараат повеќе фондови, а на долг рок – бенефитот ќе го имаат нашите граѓани, уверуваше Ковачевски.

Тој го престави и предлогот за заклучоци, што не биле усвоени, а во кои стоело дека евроинтеграцијата е надпартиски интерес, дека согласно нашиот интерес за членство сите чинители во Собранието треба да дадат поддршка, а при водењето на преговорите со ЕУ треба да се придружуваме на позицијата за јазикот и идентитетот како елементи за кои нема да се преговара, а во согласност со резолуцијата што беше усвоена во Собранието.

Премиерот изрази задоволство што сите претседатели на парламентарни партии освен двајца присуствувале на средбата.

Клучно е дека седнавме на маса да разговараме за овие прашања. Ние како Влада сме отворени за соработка и сега е потребна инклузивност и обединетост, а темата за ЕУ да не е терен за дневна политика, рече тој.

Претседателот на ВМРО-ДПМНЕ, Христијан Мицкоски, пак, потенцираше дека на лидерската средба не се разговараше за ниедна важна тема за граѓаните и кризата во која се наоѓаме, туку само за уставните промени.

Мицкоски: Место за кризата се зборуваше за отворање на Устав, се делеше еден смешен документ

Она што можам да го заклучам е дека мнозинството нема мнозинство за уставни измени и водејќи се од овој заклучок логичен след на настаните е Парламентот да се распушти, да формираме техничка влада и да одиме на предвремени парламентрани избори, нагласи лидерот на опозициската ВМРО-ДПМНЕ денеска по лидерската средба во Собранието.

Тој ја критикуваше власта за она што се разговарало на лидерската средба. Истакна дека наместо за реалните проблеми со кои во моментов се соочуваат граѓаните, тие разговарале за отворање на Уставот и бараните уставни измени.

Претпоставувам пред мене тие што беа генерално го објаснија духот на средбата денеска, но јас ќе кажам како ние ја видовме оваа средба. Најпрвин жалиме што кај Владата и кај мнозинството нема доволно слух за реалните проблеми на граѓаните, па на оваа средба не се разговараше на пример за денешниот податок кој што излезе, а тоа е 20% инфлација или пак за 31% зголемени цени за храната и безалкохолните пијалоци. Тоа се суштинските проблеми што ги мачат граѓаните, како ќе ја поминеме оваа зима, со кои предизвици ќе се соочиме, каква е подготвеноста на владата. Тоа се оние реални за кои што треба да се разговара на едни вакви средби на кои што се политичари кои што носат одговорност и кои што треба да им помогнат на граѓаните и да разговараат за тие теми, рече Мицкоски.

За жал, додаде тој, денеска мнозинството ја пропушти оваа можност и бидејќи ја пропушти оваа можност единствената тема која што беше во нивен фокус е тоа што нив ги интересира за дефокус на ова се каде што се тие неуспешни, а тоа е таканаречените уставни измени под превезот на некаква си европска иднина која што многупати во минатото самите тие ја погазија.

Од она што можам да го заклучам, а тука се и останатите претседатели на политички партии кои што се дел од коалицијата парламентарна, тука се Иван Стоилковиќ и Љупчо Димовски дека мнозинството нема мнозинство за уставни измени. Нема мнозинство за уставни измени и водејќи се од овој заклучок логичен слет на настаните е парламентот да се распушти, да формираме техничка влада и да одиме на предвремени парламентарни избори. Тоа беше и од наша страна побарано, денеска на денешниот состанок, откако стана очигледно дека немаме мнозинство кое што би гласало за, еве, евентуални уставни измени кои што ги предлага владиното мнозинство, рече Мицкоски по средбата.

Констатиравме, вели тој,  и дека ова е задоцнета средба и дека консензус, консултации со парламентарни политички партии се прави пред да се носат одлуки.

Вака, пост фестум консултации се непотребни, фрустираат и само за да не бидеме прогласени како коалиција која што, еве е антидржавна, неконструктивна и е спротивна на иднината на државата. За тоа се одваживме и дојдовме денеска, свесни при тоа дека можеби нема да разговараме за она што ги мачи граѓаните и дека нема да има никаков резултат од денешните средби, иако, морам да кажам дека помалку комично делуваше еден документ кој што беше поделен на крајот од средбата, кој што требаше да бидат некакви си заклучоци кој што го одбивме и воопшто не сакаме ни да го коментираме, бидејќи самото тоа не е европски чекор, еве ви заклучоци да се сложиме и да ги усвоиме овие заклучоци, рече Мицкоски.

Потврди дека пратеникот и претседател на Демократски сојуз, Павле Трајанов денеска предложил да излезат од оваа средба со заклучок каде што ќе побараат од бугарската Влада да го признае македонското малцинство во Бугарија и при тоа, да ги признае правата кои што се резултат на пресудите на Судот за човекови права во Стразбур.

Јас лично го поддржав овој заклучок и жалам што останатите кои што се дел од владиното мнозинство не успеа да се надминат и да го поддржат овој заклучок и да излеземе со еден заклучок еден заеднички и да го поддржиме нашинците од тој дел на границата. Коалицијата која што ја предводи ВМРО-ДПМНЕ го поддржа пратеникот Павле Трајанов и претседател на Демократски сојуз но очигледно дека во владиното мнозинство немаше слух за такво нешто. Така што да заклучам, мнозинство за уставни измени нема, логичен слет на настаните е организирање на предвремени парламентарни избори, додаде Мицкоски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.