Премиерот Христијан Мицкоски и министерот за локална самоуправа Златко Перински денеска ќе имаат средба со градоначалничката на Град Скопје, Данела Арсовска.

Како што информира владината прес-служба, средбата ќе се одржи во 15:30 часот во Владата. По средбата, иако се очекуваше градоначалничката да ѝ се обрати на јавноста, сепак изјава за медиуми ќе даде само министерот Златко Перински.

Премиерот Мицкоски пред неколку дена изјави дека е подготвен за секое решение за проблемите во главниот град, но доколку нема прогрес, рече, „тогаш ќе мора да одиме радикално и инвазивно“.

Тој нагласи дека прифаќа сѐ што е во интерес на скопјани. Затоа што, рече, „градот мора да функционира нормално“, посочувајќи дека претстои и почеток на нова учебна година и граѓаните веќе се враќаат од годишните одмори.

Град Скопје во петокот попладнето со допис до медиумите го повика премиерот Мицкоски „да го одреди датумот, местото, темите за разговор и форматот на состанокот“.

Градските власти во соопштението наведоа дека очекуваат и потврда за предлогот за формирање заедничко работно тело помеѓу Владата и Град Скопје.

Се надеваме на искрен и партнерски пристап од страна на Владата на Р. Македонија, во корист на граѓаните на градот Скопје, наведено е во соопштението.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.