Американската амбасадорка, Анџела Агелер, одговарајќи на новинарско прашање за тоа кои имиња ќе се најдат на „црната листа“, порача дека постојат повеќе листи согласно кои различни лица можеби се истражуваат во различни контексти во однос на корупцијата и сите тие лица се истражуваат за да може да се донесат соодветни санкции.
Агелер додаде дека, сепак, информациите треба да дојдат од Вашингтон.
Стојам зад тоа што го реков пред некој ден и сметам дека тоа е вистина, меѓутоа сепак информациите треба да дојдат од Вашингтон и јас не можам да ви дадам ниту некои временски рокови, ниту број на тоа колку лица би биле откриени, изјави Агелер, по посетата на армискиот полигон „Криволак“ со министерката за одбрана Славјанка Петровска.
Прашана за посетата на координаторот за антикорупција на американскиот Стејт департмент, Ричард Нефју, Агелер изјави дека и е драго што специјалниот координатор успеал да одвои време и да дојде тука.
Јас бев утрово на средбата со претседателот Пендаровски и мило ми е што успеа да го вметне овој планиран состанок во неговата агенда. Тој не е тука да открива имиња за црната листа, ниту нешто слично, туку е тука да се дискутираат процесите, санкциите, протоколите што Владата на САД ги има по ова прашање со корупцијата. Ние сме во тесна соработка со Вашингтон, постојано секојдневно комуницираме и мислам дека Нефју е баш еден добар сојузник и промотор на сите овие процеси за борба против корупцијата која што сметам дека и за вас е едно од најважните прашања, изјави Агелер.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Comments are closed for this post.