За првпат после многу години на фестивалот „Скопско лето“ 2022 ќе има и грчко учество под покровителство на Генералниот секретаријат за грчка дијаспора и јавна дипломатија при грчкото Министерство за надворешни и со поддршка од Канцеларијата за јавна дипломатија на Амбасадата на Грција во Македонија.

Во среда, 6 јули 2022, во 21:00 часот, јавноста ќе има можност да го почувствува силниот и освежителен бран од свинг и џез ноти за време на концертот на „Џим Политис Квартет“, којшто ќе се одржи во платото на „East Gate Mall” во соработка со „Скопско лето 2022“. Џим Политис (гитара) ќе биде придружуван од Јоргос Пациотис (гитара), Костас Арсенис (контрабас) и Серџио Хрисовицанос (виолина).

На настанот ќе се обрати шефот на Канцеларијата за јавна дипломатија на Амбасадата на Грција во Македонија, Константинос Прокакис, а видео обраќање ќе има и генералниот секретар за грчката дијаспора и јавна дипломатија, почесниот професор, Јоанис Хрисулакис.

Слоганот на концертот гласи „Вложуваме во културата која нѐ спојува“. Македонија и Грција имаат извонредна џез сцена, а фестивалот „Скопско лето“ претставува еден од најпрепознатливите културни настани кој ќе им овозможи на уметниците, на љубителите на музиката и на публиката од двете земји да се спојат на едно место, да се запознаат и да се забавуваат, вели организаторот.

Канцеларијата за јавна дипломатија на Амбасадата на Грција во Македонија и Дирекцијата за култура и уметност на Општина Скопје, додаваат од таму вложуваат во културата која нѐ спојува и ги канат граѓаните и посетителите на градот да присуствуваат на овој музички настан.

Влезот е бесплатен.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.