Националната опера и балет (НОБ) доби концертен клавир од брендот „петроф“, донација од Чешката амбасада во Македонија. Донацијата вечерва ја предаде Зузана Петрофова, директорка на чешката фабрика за концертни пијана „Петроф“ и внука на основачот, на денот кога се прославува Националниот ден на Чешка.
На настанот, освен Зузана Петрофова, присустуваа и бројни гости од дипломатскиот кор и од културниот и бизнис секторот во земјава, а овој чин на зацврстување на односите во културата го поздрави заменик-министерот за култура, Даим Лучи.
Тој истакна дека со амабасадорот на Чешката Република, Јарослав Лудва се согласни дека соработката што се негува во културата е вистинско богатство, но има уште многу можности кои не се искористени.
Новото концертно пијано ќе го збогати звукот и ќе го подобри квалитетот на изведбите во оваа музичко-сценска установа. Верувам дека тоа ќе ги мотивира и уметниците за поголема креативност на сцената и страст во музицирањето што на крајот ќе биде врвно уживање за публиката.
Уверен сум дека вечерва ќе имаме одличен музички настан со двете реномирани чешки пијанистки, со надеж дека што поскоро на сцената на Националната опера и балет да ги видиме заедно и македонските и чешките уметници, истакна Лучи.
Заменик-министерот за култура потенцираше дека вечерашниот настан, поддржан од Министерството за култура и од Националната опера и балет со директорот Васо Ристов, е уште една потврда дека уметноста и културата секогаш се вистинскиот чекор кон просперитетна иднина.
Пијаното е донација иницирана од Чешка, во која свој удел имаат и компании од Македонија. Овој модел на соработка отвора нови можности за подигнување на квалитетот во изведбите и на новите копродукциски соработки.
Присутните го проследија настапот на чешките пијанисти Ема Једличка Гогова и Ина Асламас-Дуо Асламас-Гогова.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Comments are closed for this post.