Цените на нафтата пораснаа на меѓународните пазари поради прекините во снабдувањето и олеснувањето на ограничувањата поради Ковид во Кина, најголемиот увозник на сурова нафта во светот. Цената на барелот порасна за 64 центи на 78,63 долари на пладневното тргување на лондонскиот пазар во однос на претходното затворање. И барелот на американскиот пазар зајакна, за 39 центи, на 73,56 долари.

Цената падна на 70,25 долари во САД во понеделникот, многу блиску до нивото од 70 долари на кое американскиот претседател Џо Бајден имаше намера да ги обнови американските резерви на нафта. Тоа ги поддржа цените во вторникот, со дополнителна поддршка по олеснувањето на ограничувањата за „Ковид-19“ во Кина, заканата од пониско руско производство како одговор на ограничувањата на нејзината цена на нафтата и затворањето на гасоводот Кистоун во САД.

Рестартирањето на гасоводот Кистоун на ТЦ Енерџи, кој ги снабдува САД со 620.000 барели канадска сурова нафта дневно, останува неизвесно по прекинот минатата недела. Прекинот на гасоводот ги зголемува очекувањата дека залихите на сурова нафта во САД минатата недела паднале за 3,9 милиони барели. Во текот на денот ќе биде објавен извештај од Американскиот институт за нафта. Намалувањето на понудата доаѓа во време кога извозот од руските пристаништа на Балтичкото и Црното Море опаѓа овој месец.

Инвестициските банки Банката на Америка и Голдман Сакс објавија во понеделникот дека успешното повторно отворање на економијата во Кина може дополнително да ги поттикне цените на нафтата над нивото од 90 долари за барел.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.