Хрватскиот министер за внатрешни работи Давор Божиновиќ денеска изјави дека синоќа околу 600 мигранти биле спречени да влезат во Хрватска, оценувајќи дека тоа е невиден број.

– Само во текот на изминатата ноќ, околу 600 илегални мигранти беа спречени да влезат на територијата на Република Хрватска, тоа се бројки без преседан, изјави Божиновиќ на маргините на одбележувањето на 33-годишнината од формирањето на Антитерористичката единица Лучко.

Тој објасни дека оние кои влегуваат имаат „одредени права“ кои Хрватска ги почитува, додавајќи дека Хрватска организирано ќе ги носи мигрантите во центрите за регистрација, од кои организирано ќе заминуваат.

Божиновиќ рече дека еден таков центар треба да се отвори во Дуги Дол кај Крњак, во Карловачката жупанија, каде неодамна се одржа протест поради пренамена на поранешен воен полигон во центар за регистрација на мигранти.

Тој нагласи дека цела Европа се соочува со миграциски притисок бидејќи милиони луѓе од Африка и Блискиот Исток својата иднина ја гледаат на европскиот континент.

Хрватскиот министер рече и дека годинава се уапсени рекорден број шверцери, повеќе од 850.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.