Веќе 12 дена активен е пожарот во областа Еврос во североисточниот дел на Грција, а грчките пожарникари заедно со нивните колеги од девет земји продолжуваат со напорите за целосно ставање под контрола на огнената стихија во кој досега изгорела површина од над 81.000 хектари, јави дописничката на МИА од Атина.

Вчера имаше ново разгорување на едно од активните жаришта поради што беше испратена порака од бројот 112 за итни случаи за превентивна евакуација на жителите на едно село.

Според грчката новинска агенција АНА-МПА во гаснење на пожарот интервенираат 475 пожарникари со 100 возила, 16 пешадиски тима, 11 авиони и седум хеликоптери.

Во борбата со огнените јазици помагаат противпожарни сили од Кипар, Германија, Бугарија, Србија, Франција, Чешка, Романија, Словачка и Албанија.

Националната опсерваторија во Атина и порталот Метео утрово објавија нови сателитските снимки од опожарените области, снимени од Службата за брзо мапирање Коперник на Европската комисија, од „најголемиот шумски пожар во последните многу години на европско тло“.

Вкупната површина изгорена од шумскиот пожар кај Еврос, заклучно со вчера напладне е 81.260 хектари, од кои околу 65.000 хектари изгореле за само три дена, во период од 21 до 23 август.

Коперник преку Твитер, вчера соопшти дека изгорената површина е поголема од Њујорк, додека пак според Европската комисија, пожарот во областа Еврос е најголемиот во ЕУ од 2000 година.

Пожарот избувна на 19 август, поради силниот ветер брзо се прошири, а гори веќе 12-ти ден.

Пожарот го зафати и Националниот парк Дадиа-Лефкими-Суфли, заштитениот регион Натура 2000 со борови и дабови шуми каде што коегзистираат голем број видови флора и фауна и е дом е на три од вкупно четири европски видови мршојадци и е едно од ретките засолништа за 36 различни видови загрозени грабливци.

За обнова на шумите како во Еврос така и на планината Парнита во близина на Атина, грчкиот премиер Кирјакос Мицотакис вчера одржа состанок со раководствата на Министерствата за животна средина и енергија и за климатска криза и цивилна заштита, и беше одлучено да се преземат итни мерки како што се пошумување, грижа за преживеаните животни и поставување бариери за заштита од поплави.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.