Висока парична казна што може да достигне и до 30.000 евра и затворска казна, дури и да станува збор за пожар од небрежност, се дел од одлуките донесени на денешната средба на министрите за климатски кризи и правда на Грција Василис Кикиљас и Јоргос Флоридис за воведување построги казни за предизвикувачите на пожари во земјата, јави дописничката на МИА од Атина.

Министерот за правда на Грција Јоргос Флоридис објасни дека во рамките на планираните промени на Кривичниот законик ќе настојуваат „да го исфрлат чувството на неказнивост, а казните ќе се издржуваат“.

Криминалното дело подметнување пожар веќе се казнува со тешки казни. Она што ќе биде вклучено во основните промени на Кривичниот законик ќе биде дека и делата сторени од небрежност, доколку казната е над една одредена  граница, овие казни ќе водат во затвор, рече Флоридис.

Министерот за климатски кризи и цивилна заштита Василис Кикиљас истакна дека паричните казни ќе бидат „повеќекратно повисоки од оние што важат сега“ и ќе бидат на исто ниво со казните за злоупотреба на животни, „односно дури и 20.000, 25.000 или 30.000 евра“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.