Настасја Кински во Белград ја прими наградата „Златен печат“ за исклучителен придонес во филмската уметност

Актерката Настасја Кински ( 62) во Белград ја прими наградата „Златен печат“ на Југословенската кинотека за исклучителен придонес во филмската уметност.

Вредното признание на актерката и го додели директорот на кинотеката Југослав Пантелиќ, кое беше проследено со овации од публиката во салата „Макавејев“.

Настасја Кински истакна дека многу и значи признанието на Југословенската кинотека.

Драго ми е што ја добив наградата за целокупната моја креативност. Посебна благодарност до режисерите на филмовите во кои глумев и до мајка ми. Исклучително ми е драго што луѓето од Украина и Русија доаѓаат во Белград и Србија да живеат во мир, а не да се борат. Мирот е она што ни треба најмногу во овој момент, изјави Настасја Кински, пренесува Танјуг.

Позната актерка, која играше во повеќе од 60 филмови во Европа и САД е ќерка на познатиот актер Клаус Кински. Родена е во 1961 година во Берлин, а кариерата ја започна како модел. Се школувала во странство, а на предлог на режисерот Роман Полански студирала глума во студиото Актори на Ли Стразберг. Првата значајна улога ја имаше во филмот на Вим Вендерс „Погрешен потег“ (1976).

Таа го привлече вниманието на меѓународната публика во драмата „Остани како што си“ (1978) од Алберт Латуада, каде нејзин партнер беше Марчело Мастројани.