Холандските власти денеска потврдија дека кравата што умрела на фарма во таа земја имала таканаречена кравјо лудило.

Тоа е невродегенеративно заболување на говедата што може да предизвика смртоносно заболување на мозокот кај луѓето кои јадат заразено месо.

Фармата каде што умрела кравата била изолирана, а самото заразено животно „не било дел од синџирот на исхрана и не претставува закана за безбедноста на храната“, напиша министерот за земјоделство Пиет Адема до членовите на холандскиот парламент.

Болеста, чие техничко име е говедска спонгиформна енцефалопатија или БСЕ, за прв пат е регистрирана во доцните 1980-ти кај говеда во Велика Британија.

Стотици луѓе тогаш, откако конзумирале заразено месо, се разболеле од болеста што ја предизвикува БСЕ кај луѓето, која се нарекува болест Кројцфелд-Јакоб, а многумина починале.

Во тие години беа уништени околу 4,5 милиони говеда со цел да се спречи ширењето на болеста. Бројот на заболени се намали само кога се воведе строга контрола и се забрани консумирањето месо и коскената срцевина на заразените крави. Последниот случај на БСЕ е регистриран во Холандија во 2011 година.

Холандските експерти сега вршат тестови за да утврдат за кој тип на кравјо лудило се работи, бидејќи таканаречената класична БСЕ се јавува кога добитокот се храни со контаминирана храна, додека друга варијанта, атипична БСЕ, се јавува спонтано.

Се истражува дали угинатата крава има потомство и која друга стока била нахранета и одгледана со угинатата крава. Доколку се открие дека ги има, ќе бидат тестирани за БСЕ, ќе бидат убиени и уништени, соопшти Министерството. Доколку заразената крава имала класична БСЕ, ќе треба да се утврди дали и другите говеда биле хранети со храна од истиот извор, објави Адема.

„Во тој случај потребно е да се преземат итни мерки за контрола на безбедноста на храната и јавното здравје“, додаде министерот.

Холандската влада не ја откри локацијата на фармата на која умрело животното.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.