Маж вчера со мачета уби едно црковно лице и рани свештеник во нападите на две цркви во Алхесирас пред да биде уапсен, соопшти синоќа шпанското Министерство за внатрешни работи, појаснувајќи дека случајот се истражува како потенцијален чин на тероризам.

Министерството не го соопшти идентитетот на уапсениот во овој град на југот на Шпанија.

Мажот прво влегол во црквата Сан Исидро и со мачета го нападнал свештеникот, кој е тешко повреден, соопшти Министерството, а локалните медиуми пренесуваат дека е хоспитализиран.

Напаѓачот потоа отишол во црквата во Нуестра сењора да ла Палма, и со мачета, пред овој објект, го убил црковното лице.

Локалните медиуми јавуваат дека се повредени уште најмалку три лица.

Пред Националниот суд на Шпанија е отворена истрага како потенцијален терористички акт, а полицијата се обидува да ја утврди „природата на нападот“. Не се соопштуваат други детали.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.