Унгарија не сака да испраќа муниција во Украина, иако тоа нема да ги спречи другите земји од Европската Унија да го сторат тоа, изјави денеска унгарскиот министер за надворешни работи Петер Сијарто.

Министрите за надворешни работи на ЕУ денеска одобрија акционен план, чија цел е да се снабдат украинските сили со најмалку еден милион гранати од 155 милиметри и да се надополнат стратешките резерви на земјите од ЕУ, од кои некои се речиси целосно исцрпени.

За таа цел, две милијарди евра ќе бидат повлечени од Европскиот мировен фонд (ЕПФ), вонбуџетски финансиски инструмент на Европската Унија кој ја подобрува способноста на ЕУ да дејствува како глобален обезбедувач на безбедност.

– Унгарија не испорачува оружје. Ние сакаме мир, рече Сијарто на прес-конференција. Затоа не учествуваме. Ние не и доставуваме муниција на Украина ниту ги спречуваме другите да прават што сакаат, продолжи унгарскиот министер.

Придонесот на Будимпешта во ЕПФ изнесува околу еден процент, што е приближно десет милиони евра. Тие средства ќе се користат за други цели, како работа на стабилноста на Западен Балкан и намалување на миграцискиот притисок, соопшти Сијарто.

Министерот рече дека Унгарија нема да учествува во набавката на муниција ниту во нејзината испорака во Украина.

Сијарто оцени дека Брисел продолжува да поттикнува „атмосфера на војна“ и дека земјите што промовираат мир се под зголемен притисок да попуштат.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.