Унгарија „сигурно не може да ја поддржи“ кандидатурата на холандскиот премиер Марк Руте да стане генерален секретар на НАТО, изјави денеска унгарскиот министер за надворешни работи, Петер Сијарто.

„Ние секако не можеме да поддржиме избор на личност за генерален секретар на НАТО, која претходно сакаше да ја фрли Унгарија на колена. Би било многу чудно кандидатурата на таква личност да биде поддржана од унгарската Влада, рече Сијарто на прес-конференција во Будимпешта.

Руте беше силен поборник за правилата што го условуваат пристапот до буџетот на Европската унија со исполнување на стандардите за владеење на правото на блокот, што доведе до задржување на милијарди евра од Унгарија.

Тој сега се обидува да го замени Јенс Столтенберг како генерален секретар на Западната воена алијанса.

Но, нему му е потребна поддршка од секоја земја-членка на НАТО за да ја добие работата, што значи дека Унгарија може да стави вето. Во моментов нема други пријавени кандидати.

Руте има силна поддршка од Велика Британија, Германија и САД.

Сијарто зборуваше на прес-конференција со генералниот секретар на Организацијата за економска соработка и развој (ОЕЦД), Матијас Корман.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.