Швајцарската федерална администрација денеска беше цел на кибер-напад поради што официјалните мрежи и страниците на компаниите поврзани со неа беа недостапни, соопшти владата.

Одговорноста за нападот познат како напад со дистрибуирано одбивање на услуга (DDoS), кој го оневозможува пристапот до веб-страниците преплавувајќи ги со барања за пристап, ја презеде групата „No name“, која изврши сличен напад на веб-страницата на швајцарскиот Парламент минатата недела, се додава во соопштението.

Националниот центар за кибер безбедност спроведува истрага, но во соопштението се уште нема подетални информации за хакерите на групата „No name“.

Центарот „го анализира нападот заедно со засегнатите административни служби и ги утврдува потребните мерки“, нагласуваат надлежните, додавајќи дека во DDoS нападите не се губат податоци.

На почетокот на јуни, швајцарските власти соопштија дека истражуваат втор информатички напад врз давател на услуги чии клиенти вклучуваат многу федерални и кантонални министерства, вклучително и армијата и федералната полиција.

Тој напад на хакерската група PLAY беше насочен против компанијата Xplain AG, швајцарска компанија специјализирана за ИТ решенија во областа на внатрешната безбедност.

И два швајцарски весници, CH Media и NZZ, неодамна беа жртви на нападите на PLAY.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.