Планинарски водич пронашол остатоци од човек за кој се верува дека загинал во несреќа на глечер пред 22 години високо на австриските Алпи, соопшти денеска полицијата.

Телото било пронајдено на глечерот Шлатенкис во националниот парк „Хохе тауерн“ во источната провинција Тирол, блиску до италијанската граница и на надморска височина од 2.900 метри.

Водичот ја известил полицијата во Лиенц, која го извлекла телото со помош на хеликоптер. Неколку метри под телото спасувачите пронашле ранец со пари, банкарска картичка и возачка дозвола. Полицијата утврдила дека, најверојатно, станува збор за посмртните останки на Австриец, кој во моментот на исчезнувањето имал 37 години, јавува „Асошиетед прес“.

Исчезнатиот носел опрема за скијање. Се прави споредба на ДНК за да се потврди идентитетот на мажот, а резултатот се очекува за неколку недели. Поради топењето на глечерите, за што многу научници вината ја наоѓаат во климатските промени, има сè повеќе откритија на останки на планинари, скијачи и други алпинисти, кои исчезнале пред неколку децении.

Во соседна Швајцарија полицијата минатиот месец објави дека ДНК-тестовите потврдиле оти телото пронајдено на глечер во близина на Матерхорн е на исчезнат германски планинар од 1986 година.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.