Мигрантите кои ќе бидат спасени на море во обид да стигнат до Италија ќе бидат испратени во Албанија од август додека се обработуваат нивните барања за азил, како дел од контроверзниот договор со кој малата балканска земја ќе биде домаќин на илјадници баратели на азил.

За време на посетата на Албанија во јуни, италијанската премиерка Џорџа Мелони рече дека два центри за засолништа за мигранти ќе бидат подготвени да ги примат првите 1.000 луѓе до 1 август.

Еден од центрите, во пристаништето Шенѓин на јадранскиот брег, беше завршен пред повеќе од еден месец. Но, вториот, на околу 24 километри на исток во близина на поранешниот воен аеродром во Ѓадер, сè уште е далеку од завршување само една недела пред закажаниот датум за отворање.

Петгодишниот договор, потпишан од Мелони и нејзиниот албански колега Еди Рама во ноември минатата година, предвидува сместување во Албанија на до 3.000 мигранти собрани од италијанската крајбрежна стража во меѓународните води.

Во центрите ќе бидат сместени само возрасни мажи. Жени, деца, стари лица, болни и жртви на тортура ќе бидат сместени во Италија. Семејствата исто така нема да бидат разделени. Оние што ќе бидат испратени во Албанија ќе ги задржат своите права според меѓународното право и правото на Европската унија да поднесат барање за азил во Италија и нивните барања таму да бидат процесуирани.

Бидејќи е потребно околу еден месец за обработка на секое барање, бројот испратен во Албанија може да достигне 36.000 за една година. Италија се согласи да ги прими оние на кои им е одобрен азил. Оние чии барања ќе бидат одбиени ќе се соочат со депортација директно од Албанија.

Тие два центри во Албанија ќе ја чинат Италија 670 милиони евра во следните пет години.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.